صديق مقرب
البارحـــة
البارحة .. هاجت أشواق العمر كلها , البارحة ..
وحنيّت ألك بأكبر همومي , البارحة ..
حنيّت ألك حّنةّّّ غريب ويذكر أحبابه بعد غيبة وسفر ..
شايف حنين العمر لأيام الصبا , يتمنى يرجع ساعة لأيام الصغر ؟
شايف حنين الصيف لأيامه أذا جاه الشتا وبلا مطر
شايف حنين الطير من يعود في وقت الغروب لعشّه
ومايلقى وليفه , والشمس غابت , ولاعنده خبر ؟
حنيّت ألك ..
وردتك تعاشرني بدال أنجوم كانت سارحة ..
نجمة تسامرني غصب ونجمة تقلك رايحة ..
البارحة ..
** ** **
البارحة , وصيّت الك ..
وياما البحر ضيّع وصايا السفن والسّفانة ..
وصيّـت الك ..
وياما الدهر غرّق أحزان العاشق بأحزانه ..
وصيّت ألك ..
وياما الوطن ضيّع عناوين الأحبة ويّ عنوانه
وصيّت الك ..
وصيّت ألك حتى العصافير الزغار الفرحو دنيانا
طارت بشوقي مصبحة ياخذها العشق فرحانة
و رجعت لي مهمومة يعيني وهاكثر حزنانة !!
وطاحت هموم الليل فوق أجفوني
وي مجرى الدموع الجارحة .
والمشكلة , نجمة تسامرني غصب ونجمة تقلك رايحة ..!
** ** **
البارحة ..
غنيّت ألك كل الأغاني الليّ تحبها , البارحة
وغنيت الك
وكنت أحسب العشاق يلتمّون عندي البارحة
ولميّت ألك كل الأشعار العندي حتى أحكيلك
وردتك تجي بذيك القصيدة اللي كتبناها سوى واشكيلك
اشكيلك من الليل عذبني بغيابك من اغنيلك
أحلى الكلام الليّ يبوس أعيونك ويضوي لك
وردتك تجي لابس قوافي الذهب كلها الليّ صغتها بحبك
.. و حتى أشكيلك ..
أشكيلك من الدهر عّذبني بغيابك , ويزعل من أغنيلك
أشكيلك من الغدر .. من كثر ألأنذال السرقوا أشعاري ومواويلك
أشكيلك من الدنيا ماترضالي أزرع لك ورد بالوطن وأزهي لك
ردتك تجي ..
لكن الظلمة خيّمت , وأسمع أنين العاشقين ابقلب هذا الليل
كلمن فاقد أحبابه غصب , وكل يوم يسمع نايحة
البارحة ..
** ** **
البارحة , صوتك أسمعه يعتبّ من أبعيد , أسمعه ..
منين ؟ أصيح أمنين ؟
ياصوت النخل بالريح يبكي ودمعي دمعه !ّ!
منين ؟ أصيح أمنين ؟
ياصوت الوطن مذبوح , وماكو أحدّ يسمعه ..
منين ؟ أصيح أمنين ؟
يحبيّب , شقيق الروح , ياحلم المحبة , الغرق في دمعه
كأن الدنيا تبعد وأبعد أوياها وأسمعه
البارحة ..
والمشكلة , نجمة تسامرني غصب , ونجمة تقلك رايحة .
البارحة ..
** ** **
