الشام .~♥ ♥ وقت تقول الشام لازم تعرف أنه .~♥ ♥

اليوم بصراحة الموضوع

بمناسبة إعادة فتح قسم

الشام

مرة ثانية

واللي أسميناه

كمان بصراحة الواحد محتار

يكتب لغة عربية فصحى

ولا يحكي شامي

مع أنه وقت بحب أكتب شي من قلبي بحب أحكي شامي أنتوا شو رأيكم بأخر الموضوع بيبين معكم توفقت بالموضوع ولا ما توفقت لأني بحكي اليوم شامي

وقت تقول دمشق تلتصق بذهنك العراقة والتاريخ والأصالة

بس وقت تقول عن دمشق

((( الشـــــــــــــــــــــــام)))

يعني أنت من أهل الشام حصرا

وقت تقول الشام طبيعي لازم تكون بتعرف شجرة النارنج واللي ما بيعرف شجرة النارنج بيكون من الجيل الجديد شورأيكم نقول الجيل الجديد ولا نقول الفئس الجديد

وقت تقول الشام لازم تعرف شو يعني الوردة الجورية

ولازم تعرف شو يعني الياسمين الياسمينة نبتة بتفتح ورد ابيض بيكفي تكون ريحته عطر للعطور

وشمته نشوة للقلوب الياسمين الشامي بينزرع في أكتر من مكان صح ؟

بينزرع داخل البيوت الشامية

وبينزرع على سور البنايات وكلمة بناية (( عمارة )) كمان كلمة شامية

بينزرع كمان بدفاتر الصبايا بكتبهن

بينزرع بمناديل العشاق

وبينزرع بجيبة القميص الأبيض

وقت تقول الشام لازم تعرف نهر بردى واخوات نهر بردى

نهر تورا / نهر الديراني / نهر بانياس / نهر االقنوات / نهر يزيد / نهر المزاوي / نهرالعقرباني

بالمناسبة أنا سابح بنهر بردى وسابح بنهر يزيد

ونهر يزيد بيمر من داخل بيت جدي يلي بالعفيف

مع أنه أغلب هذا الجيل يمكن ما بيعرف غير نهر بردى وبيعرف أنه يتفرع لسبعة فروع

وقت تقول الشام لازم تعرف شو يعني حبلاس / شجرة الحبلاس /

وقت تقول الشام لازم تكون بتعرف غنية وديع الصافي

يلي بتقول : يا توت الشام يا شامي يا شامي سلم ع السمرا اللي ع خدا شامة

يعني لازم تعرف شو يعني التوت الشامي يعني ممنوع قميص أبيض وتقول بدي قطف توت شامي

يعني بدك تستغني عن كم بقعة ينصبغ فيها القميص

يعني كفوفك واصابيعك لازم تدوق التوت الشامي قبلك



وقت تقول الشام لازم تعرف شو يعني كلمة العوجا وكيف الملح ترافق مع العوجا وكيف العوجا بتجي قبل الجارنك

صح كلمة الجارنك ؟؟

العوجا والجارنك أكثر من مكان محبب الأكل معهم

بتتاكل العوجا أول شي عالماشي وطيابيتها وأنت بطريق الصالحية

ولو أشتريت كيلوا عوجا للبيت ضروري ضروري تقول لبياع العوجا حطلي شي وقية لحالها على جنب ورشلي عليها شوية ملح لأنه لو أشتريت بس كيلوا للبيت مو مضمون يوصل الكيلوا كيلوا

والعوجا بتتاكل كمان بالسيارة عالماشي

حتى سواق التاكسي بيقرب جنب بياع العوجا وبيطلع نصه من الشباك وينك يا أبو الشباب حطلك وقية عوجا وكتر الملحات

والعوجا بتتاكل بالسهرة بالجمعة بجمعة العيلة على التلفزيون وأكيد مو ضروري تكون بصحن واحد قدام الكل

لأنه كتير معقول كل واحد ياخد حصته بزبيدة ويحط الزبديه بحضنه وجنبها صحن قهوة فيه شوية ملح

مع أنه العوجا ها لأيام صايرين عم يحطوها جنب جهاز الكمبيوتر

وقت تقول الشام بتعرف شو يعني كراوية وبتعرف أنه يعني كراوية في بيبي صغير وفي مولود بيت فلان

وقت توقف بالبزورية (( البزورية يعني سوق العطارين عند بياع العطارة ))

وتقول للبياع الله يوفقك اخي بدنا كيلوا كراوية

مباشرة البياع بيقولك: ريته ألف مبروك كروية مع المكسرات والحباشات ولا بس كراوية

لحاله بياع الكراوية بيعرف أنه في بالبيت مولود جديد

وقت تقول الشام

بتعرف أنه الحديث بعد طويل

والحديث ما أنتهى

وللحديث بقية

وقت تقول الشام لازم تعرف انواللي بيربى بالشام ما ممكن يتنكرلها
انو اللي تنفس من هوى الشام ما ممكن ينساه
انوما في أحلى من التمشاية باليل بشوارع الشام السيارات الأضوية الناس
وقت تقول الشام لازم تعرف انو كل شي كل شي حلو
شو أحلى من القعدة المسا على المقاعد بساحة الصالحية
شو أحلى من التمشاية بالحريقة
ما في أحلى من الضو الخافت بسوق الحميدية
وقت تقول الشام لازم تعرفلما تقول الشام لازم تعرف انو ما في أروع من زيارة الجامع الأموي
فيه البركة والراحة والنشوة
انو ما في أطيب من بوظة بكداش وعصير أبو شاكر
لما تقول الشام لازم تعرف انو كل شي الو نكهة خاصة
المدرسة البيت الشارع
قهوة الصبح شاي المسا
انو ما في أطيب من التسقية صباح الجمعة
انو ما بتحلى المسوية دون السهرة غالأسطوح وقعدة البلكون
لما تقول الشام وبتقول رمضان بالشام
بتتذكر فورا شوارع الشام برمضان
بياع السوس التمر هندي قمر الدين
بياع الناعم والمعروك
وقت تقول الشام لازم تعرف انو حتى لو بعدت عن الشام روحك بتضل معلقة فيها
اوقت تقول الشام لازم تعرف انو الحديث عن الشام صعب ينتهي لهيك للحديث بقية........ا

ما رح جاكرك انه انتي مو بالشام
اصلا انا عرفت انه انتي عم تلطشي حكي بدك تجي تزوري عنا

زهرة النرجس كتب:
ما رح جاكرك انه انتي مو بالشام
اصلا انا عرفت انه انتي عم تلطشي حكي بدك تجي تزوري عنا

اي والله مزبوط شلون عرفتي ؟؟
بكل الأحوال جهزيلي حالك بهاليومين جاية زوركن وعالأغلب بكرة

ووقت بتفرأ هيك موضوع مافيك غير تنزل دموعك

ربي من سابع سما. يحميكي ويفرج عليكي

يا حبيبة قلبي يا شام

والله معك حق يا سوسو
وكمان وقت تقول الشام بتمنى منك تدعي الله يخفف مصاب الشام ويفرج عنها و(وما يسمح للغدر والظلم يدنس أرض الشام) لأنو الشام طول عمرها طاهرة

الأسواق الدمشقية:

أسواق دمشق القديمة ذات السقوف لكل منها نكهة خاصة وأشهرها سوق مدحت باشا وسوق الحرير وسوق البزورية، إضافة إلى سوق الحميدية وهو السوق الأشهر في سوريا، ويعود تاريخ بنائه إلى العام 1863 خلال حكم السلطان العثماني عبد الحميد الذي سمي السوق باسمه، وحوانيت السوق تشتهر بجميع أنواع البضائع ولاسيما الملابس والأقمشة والصناعات التقليدية.

وسوق البزورية يشتهر بأريجه المتميز، فحوانيته الصغيرة تغص بأنواع البهارات والعطور واللوزيات والفواكه المجففة والأعشاب الطبية والحلويات والبزورات وفي وسط السوق يقع حمام النوري وهو أحد الحمامات العامة المتبقية من نحو 200 حمام كانت في دمشق منذ القرن الثاني عشر، وإلى جنوب السوق يقع البيمارستان النوري الذي يضم الآن متحف الطب والعلوم عند العرب.

ومن أهم المعالم السياحية في دمشق المتحف الوطني وهو واحد من أهم متاحف العالم وفيه الكثير من التماثيل والحلي والأسلحة واللوحات والمنحوتات والمخطوطات.

كما تشتهر دمشق بالمقاهي الشعبية، أبرزها يقع في حي النوفرة. وفي مناطق الربوة والغوطة توجد مقاهٍ شعبية تلبي رغبات السائح في الاطلاع على جمالية وبساطة هذه المقاهي المشهورة بتقديم الشاي والقهوة والنرجيلة.

وفي دمشق العديد من الساحات ومنها ساحة الأمويين والعباسيين والسبع بحرات وبوابة الصالحية، غير أن أشهرها ساحة المرجة التي أنشئت في العصر الهيليني القديم، وتسمى أيضا ساحة الشهداء نسبة إلى شهداء سوريا الذين سقطوا على أيدي المستعمر الفرنسي.

وتوجد حول دمشق العديد من مناطق الاصطياف المشهورة بمناخها وخضرتها وفاكهتها وأبنيتها ومطاعمها مثل: الزبداني وبقين وبلودان وعين الفيجة ومعلولا وصيدنايا ومضايا دمّر والهامة وغيرها.